Rusiye apsinde sekiz yıl keçirgen ve azat etilgen soñ ğayıp olğan sayılğan ukrayin Ğennadiy Lımeşko Rusiyede kene mahküm etildi. Stavropolye mahkemesi onı eki yıl sert rejimli koloniyada qalmasına üküm etildi. Bu aqta «Ekstremizmu - NET!» Telegram kanalı ve «Suspilne» cemaat yayınlayıcısı bildireler.
Lımeşko internette ekstremizmge çağıruv maddesine istinaden (Rusiye Ceza kodeksiniñ 280-inci maddesiniñ 2-nci qısmı) qabaatlı tanıldı.
Rusiye tahqiqatınıñ versiyasına köre, erkek içtimaiy ağlarda millet mensüpligine köre zorbalıqqa çağırğan eken.
İşğal etilgen Qırımda ekstremizmde qabaatlanıp mahküm etilgen ukrayin Ğennadiy Lımeşko azat etilgen soñ ğayıp oldı. Stavropol ülkesindeki koloniyadan onı Rusiyeniñ Rostov vilâyetinde çetel vatandaşlarını vaqtınca tutuv merkezine yolladılar, anda martnıñ 13-ne qadar tutuldı. Yaqında ise Lımeşkonıñ adı Rosfinmonitoring saytında «terrorist ve ekstremistler» cedvelinde peyda oldı. Bir qaç afta devamında bulunğan yeri belli degil edi, aq qorçalayıcılar onı ğayıp olğan olaraq saydı.
Qırım.Aqiqatnıñ malümatına köre, yüzlernen ukrayinalı sabıq siyasiy mabüs Rusiyede koloniyalardan azat etilgen soñ yañı cinaiy davalarnı aluv telükesi olğan sürgünlik merkezlerine oğray.